قێزه ونکردنی سیاسه ت
قێزه ونکردنی سیاسه ت 


کاریگەریی سیاسەت لە ئێستا و لە سەردەمەکانی پێشتریشدا، لە کوردستان و لەجیھاندا ڕاستییەکی حاشاهەڵنەگرە، هەر سیاسەتە ئاراستەی ھەموو سێکتەرەکان دەکات، سیاسەت کاریگەریی ھەیە لەسەر بەرزبوونەوە و نزمبونەوەی دراو، سیاسەت ئاراستەی سیستمی ئابووری دیاریدەکات، سیاسەت کاریگەری ھەیە لەسەر ئاین، سیاسەت پەروەردەو فیکر ئاراستە دەکات.


ژیان لە ئەمڕۆدا لە ژێر کاریگەریی سیاسەتدایە، سیاسەتیش واتە دەسەڵات، چونکە لە دەسەڵاتەوە سیاسەتی گشتی و تایبەت پیادەدەکرێت، میکانیزمی چوونە دەسەڵاتیش بریتیە لە بەشداری کاری سیاسی ، کە خۆی لە کاری حزب، یان لیست، یان رەوتێکی سیاسیدا دەبینێتەوە.

هەربۆیە گەر بمانەوێت گۆرانکاری ڕیشەیی ئەنجام بدەین پێویستە ھەنگاوی یەکەم لە ڕێگەی کاری سیاسیەوە بێت و بەشدار بین لەکاری سیاسیدا .

نھێنییە گەورەکەش لێرەدایە، دەسەڵاتە دیکتاتۆرو گەندەڵەکان لە پێناو مانەوەی خۆیان لە دەسەڵاتدا و بەردەوامبوونیان لەسەرگەندەڵی و تاڵانکاری و کۆنترۆڵکردنی تەواوی جومگەکانی ژیان، بە پیلان و بەرنامە ھەوڵدەدەن سیاسەت قێزەون بکەن، بۆیە هەوڵ دەدەن حزب و حزبایەتی سوک و بێبەها بکەن لای ھاوڵاتیان، سیاسیەکان بێ نرخ ئەکەن ، خەلک بێ ھیوا دەکەن لە ھەڵبژاردن، بێ ھیوایی بلاو دەکەنەوە و ئومێد کوێر دەکەنەوە، تا وا لە ھاووڵاتیان بکەن باوەڕیان بە ھیچ شتێک نەمێنێت و ئاڵای سپی ھەلبکەن و نغرۆی نائومێدییان بکەن وبەشداری ھیچ کارێکی سیاسی نەکەن.


بەمەش ھیوا و ئاواتیان دێتەدی و زۆرینەی خەڵکی وا لێدەکەن بە ناوی بێ لایەنبوونەوە دەینێرنەوە ماڵەوە و خۆشیان لەسەر تەختی پاشایەتی حوکمڕانیی ئەو خەڵکە دەکەن.

بۆیە پێویستە خەڵکی بێدار ببنەوە و ھوشیاربن نەکەونە داوی ئەوپیلانە و دڵنیابن لەوەی کە نەسیاسەت قێزەونە و نە حزبیش بۆگەنە، ئەوە ئەوانن سیاسەت و حزبیان ناشیرین کردووە، بۆیە گەر دەمانەوێت گۆرانکاری بە ئەنجام بگەیەنین دەبێت بەشداری سیاسەت بکەین و ھاوکاری و پشتیوانیی کاری سیاسی بکەین، تا ژیانی خۆمان و دەوروبەرمان بگۆرین و مافە پێشێلکراوو زەوتکراوەکانمان بەدەست بێنینەوەو نەوەکانی داھاتوشمان دەرباز بکەین لە چارەنوسێکی سەخت و دژوار